Нурзадә әнисенең вафатын искә төшерә
"Бүген елның иң ямьсез көне", - дип яза Нурзадә 23 октябрь турында.
2016 елның 23 октябрендә Нурзадәнең әнисе вафат булган. Җырчы социаль челтәргә телефон экранын урнаштырган, фотодан аңлашылганча, Нурзадә ике шалтыратуны кабул итәргә өлгермәгән.
"Ул миңа беркайчан да шалтыратмаячак.
Мин беркайчан да аның тавышын ишетә алмыйм.
Миңа хәтта шушындый смс та килмәячәк.
Беркайда әниемнең тавышын ишетә алмам инде. Бүген иртән күзләремне ачарга курыктым, ләкин ул көн тагын җитте. Октябрьнең 23 безнең әнине мәңгелеккә алып китте.
Сагынмаган, искә төшерми калган бер генә көнем дә юк!!! Аһ ничек җитми миңа синең киңәшләрең, син үзең, Әни!
Мин менә шундый смс килсә дә куанган булыр идем әле. Бу соңгы смс, мин юлда чакта телефон тотмагач, борчылып 2 тапкыр шалтыраткан булган.
Көн дә догалар укыганда, урыны зинһар җәннәт түрләрендә булсын Әниемнең дип, Ходайдан сорыйм. Төшкә дә кермисең.
Синең якын дустың Дилбәр апа да "Төшләрегезгә дә керми сагындырырмын әле" дип киткән икән ди.
Бөтенебез сагынабыз шул сине, Әни! Әти дә, энем дә, хәтта Мәркәз дә. Ул да бит, Син авырып киткәч, синең кулларыңнан гына кочаклап ятып торды. Син җитмисең, Әни!!!
Елама дип язмагыз яме, зинһар!!!
Көне шундый.
Киттем абыстай әбиемә, сәдакәләр, күчтәнәчләр илтеп кайтам", - дип язган Нурзадә.
"Әниләребезнең рухлары шат, караңгы гүрләре якты булсын иде. Әни дә юк, әни урынына калып безне үстереп кеше иткән әби дә юк. Рәхәтләнеп еладым сезнең сүзләрне укыгач", - дип җавап язган Нурзадәнең дуслары.