Нурзадә: «Гөлләр белән сөйләшә башладым, алга таба нәрсә булыр?»
Җырчы гөлләрен күрсәтте.
Җырчы Нурзадә гөлләрен күрсәтте. Видео янына: «Гөлләр белән сөйләшә башладык. Алга таба ни булыр икән? Гөлләр ярата бит сөйләшкәнне, әйеме? Игьтибар иткәнегез бармы?» — дип язган.
Аның әнисе дә гөлләр белән сөйләшкән. Әнисе вафат булгач, гөлләр корыган, аннары әтисенә ияләнеп, үсеп киткәннәр. Җырчының элеккеге фатирында гөлләр үсмәгән, ә яңа фатирында беренче булып яран гөлләре утырткан.
Нурзадә кебек яран гөл яратучылар бик күп комментарийлар калдырган:
«Синең гөлләрең җыр тыңлап үсә инде»;
«Бездә яран гөлен песи гөле диләр. Аның исен шайтаннар яратмый. Ялгыз кешеләргә үстерергә кирәк. Ирем үлгәч, әни миңа да алып килеп утыртты. Бәлки, бу ырымга ышану яранның рейтингын күтәргәндер»;
«Мин дә яратам яран гөлен. Алар чыдам, үзебезгә охшаган»;
«Минем яраннар бер дә чәчәк атмый. Яфрак чыгарып тик утыралар. Әнинең гөлләре куркыткач кына чәчәк атты. Мин дә әрләп карыйм әле. Артык иркәләгәнмен ахры аларны»;
«Тәрәзә төбем минем берничәү, тәрәзә саен яран гөл үсә, дип җырлый-җырлый, сөйләшә-сөйләшә йөрим. Иң яраткан гөлем — яран гөл. Җәен урамга утыртам, көзен өйгә кертәм. Күңеле матур кешенең өен ярата ул. Нурзадә, синең күңелең чиста, саф».