Новосибирскиның «Алтын Йолдыз» татар яшьләре клубы активисты Украинада һәлак булган

Новосибирскидагы «Алтын Йолдыз» татар яшьләре клубына йөргән Камил Хәбибназаров Украинадагы махсус операциядә һәлак булган. Бу хакта аның әти-әнисенә 31 мартта хәбәр иткәннәр, дип яза Новосибирск татарларының ВКонтакте аккаунты.

Камилне белгән яшьләр аның яхшы күңелле, шат егет булуын әйтәләр. Ул татар яшьләре оешмасы эшендә актив катнашкан, татар мәдәниятен яшьләр арасында популярлаштыру өчен тырышкан. «Аның исеме дә «Камил». Ул тормышта да шундый иде. Мин аның шундый икәнен беренче танышканда ук күрдем. Камилнең әти-әнисенең кайгысын уртаклашам. Урының оҗмахта булсын, Камил», дип язган аның тынышы Вәсилә.

Камил белән хушлашу иртәгә, 11 апрельдә җирле вакыт белән 10.30-11.30 сәгатьләрдә Новосибирскиның Потанинская ур., 42/1 адресы буенча узачак. Соңыннан тарихи мәчеттә җеназа һәм хәрби зиратта җирләү. Татар мәдәнияте йортында Камил истәлегенә ифтар оештырыла.

Татар оешмалары Камилнең әти-әнисе белән элемтәдә, кайгысын уртаклашалар.