Нократ Аланында җәяүлеләрне бәрдергән йөртүчегә шаһитлар самосуд ясаган
Бардан чыккан ир-ат белән кафе янындагы кешеләр арасында низаг чыккан.
Киров өлкәсенең Нократ Аланы бистәсендә исерек ир-ат җәяүлеләрне таптаткан. Аңа шаһитлар самосуд ясаган. Бу турыда РЕН ТВ хәбәр итте.
Toyota Camry машинасы белән идарә итүче исерек ир-ат берничә кешене бәрдерә һәм качып китмәкче була.
Вакыйга төшерелгән видео 23 майда социаль челтәрләрдә тарала. «Наша Раша» караоке-бары янында берничә кеше Toyota Camry машинасын туктата. Алар машинага тибә башлый, аңа авыр әйберләр ыргыталар. Качкан вакытта исерек йөртүче кимендә бер кешене бәрдерә.
Аннары бу машинаны якындагы урманда табалар. Аның тәрәзәләре ватылып беткән була.
«В городе Кирове» порталы белешмәсе буенча, бу машина дүрт кешене таптаткан.
«23 майда Эчке эшләр министрлыгының „Нократ Аланы“ бүлегенә хәбәр килде. Анда бер кафедан ир-атның исерек килеш машина белән идарә итүе, шушы ук кафеда булган кешеләрне бәрдереп китүе әйтелә. Шулай итеп дүрт кеше имгәнә. Әлеге хәл вакытында машина йөртүче качып китмәкче була. Кафе янындагы кешеләр аның машинасын вата. Машина йөртүче тоткарланган, ул исерек була», — дип хәбәр итә «В городе Кирове» басмасы Эчке эшләр министрлыгына сылтама белән.
Машина йөртүчегә карата юл кагыйдәләрен үтәмәү турында протокол төзелгән. Тикшерү билгеләнгән.