Нинди ризыклар организмнан канцерогеннарны чыгара?

Онкологлар сәламәт туклану яман шештән бик нәтиҗәле профилактика була дип саный. «Тәҗрибәләрдә тикшергәннән соң, билгеле бер ризыклар аерып алынды. Аларны даими куллану онкология авырулары килеп чыгу куркынычын киметергә ярдәм итә», — дип сөйләгән табиб-онколог Ивана Карасев. Бу турыда «Российская газета» хәбәр итте.

Белгеч унлап ризыкны атый. Куллану тыелмаган булса, шул ризыкларны рационга кертү хәерле.

Сарымсактагы кушылмалар онкологиядән саклый, аеруча тән тиресе, туры эчәклек, үпкәләр яман шешеннән.

Брокколи составындагы көчле антиоксидантлар күкрәк бизе яман шеше куркыныч да киметергә мөмкин.

Бөртекле культураларада да антиоксидантлар, фитоэстрогеннар бар.

Цитруслы җимешләрдән грейпфрутта монтерпеннар бар. Алар организмнан канцерогеннарны чыгарып, бөтен төрле яман шешкә каршы торырга ярдәм итә.

Әфилисун һәм лимонда лимонен матдәсе бар. Ул иммунитет күзәнәкләре (мәсәлән, лимфотөитлар) эшчәнлеген стимуллаштыра, ә алар яман шеш күзәнәкләрен бетерә.

Шулай ук бу исемлеккә гөмбә, җитен орлыгы, диңгез суүсемнәре, кара җиләк, помидор, яшел чәй, виноград та керә, диелә бу хәбәрдә.