Нинди гадәтләр бөерләргә зыян китерә?

Ел саен мартның икенче пәнҗешәмбесендә «Бөтендөнья бөер көне» билгеләп үтелә. 2022 елда бу дата 10 мартка туры килә. Татрстан Сәламәтлек саклау министрлыгы шул хакта искәртте.

Бөерләр — тормыш өчен мөһим орган, алар безнең организмны шлак, токсин, зарарлы матдәләрдән чистарта.

Кешенең бөере сәламәтлегенә начар йогынты ясый торган факторлар:

• хәмер эчү һәм тәмәке тарту кебек зарарлы гадәтләр;
• наркотиклар куллану;
• озак, аеруча контрольсез медикаментлар куллану;
• суны тиешле күләмдә эчмәү, аны газлы су һәм чәй, кофе кебек эчемлекләр белән алыштыру;
• аз хәрәкәткәтләнү;
• дөрес тукланмау, шул исәптән тоз һәм рациональ булмаган диеталарны артык куллану;
• төрле хроник һәм йогышлы авырулар;
• уңайсыз температура режимнары (салкын һәм эссе).

Үз сәламәтлегеңне, шул исәптән бөерләр турында кайгыртып, кайбер кагыйдәләрне үтәү мөһим:

• 1-1, 5 литрдан да ким булмаган чиста эчәргә яраклы су эчәргә кирәк;
• елга бер тапкыр булса да бөерләрне контрольдә тоту өчен, кан һәм бәвел анализларын ясатырга;
• сәламәт, хәрәкәтчән яшәү рәвеше алып бару;
• дөрес туклану, яшелчә һәм җиләк-җимешләрне ашауны арттырыга;
• начар гадәтләрдән баш тартырга;
• артериаль кан басымын һәм тән массасын контрольдә тотарга.