Әниләре авылда эштә чакта, ике бала янып үлгән, икесе реанимациядә ята

Дагыстанның Изербаш шәһәрендә 25 майда 10.40 сәгатьтә бер фатирда янгын чыга. Биредә ике нәни бала янып үлә, ике бала имгәнә. Бу вакытта балаларның 31 яшьлек әнисе туган авылында эштә була. Хәзер аңа карата җинаять эше ачылган. Бу турыда «Вести» каналы хәбәр итте.

Әни кеше балаларын өсләреннән бикләп, эшкә китә. Тикшерү версиясе буенча, биш яшьлек малай зажигалка таба һәм матрацка ут төртә. Сабыйлар ялкынны сүндерә алмый, ярдәм чакырырга да өлгермиләр. Металл ишек тышкы яктан бикле булу сәбәпле, балалар фатирдан да чыга алмый.

Янгында 3 яшьлек кыз һәм 5 яшьлек малай урында ук үлә, 8 һәм 9 яшьлек ике малай тәрәзәдән сикереп чыга. Бу вакытта күршеләр аста җәймәләр җәеп, балаларны көтеп тора. Малайлар җитди имгәнә, аларны реанимациягә озатканнар.

Хәзер балаларның анасын тоткарлаганнар. Аны «саксызлык аркасында үлемгә китерү» маддәсе буенча гаеплиләр. 

Моңа кадәр бу хатынны «Балигъ булмаган балаларын тәрбияләү буенча вазифаларын үтәмәгән өчен» административ җаваплылыкка тарткан булганнар инде.