Башкортстанның атказанган артисты Заһир Зәйнетдинов (Зәйнетдин) август азагында Санкт-Петербургта 1,5 сәгать чыгыш ясаган. Анда аның чыгышына Россиянең атказанган артисты Николай Басков бәя биргән. Бу видео социаль челтәрдәге төрле төркемнәрдә яңа гына таралды.
Видеода аңлашылганча, сәхнәдә мультиинструменталист, биюче Зәйнетдин беренчеләрдән чыгыш ясаган һәм залны җанландырып җибәргән.
Николай Басков аны сәхнә артында каршы алган. «Шартлаттың! Синнән соң ничек сәхнәгә чыгарга инде? Мәйданны җанландырдың. Текә! Искиткеч чыгыш! Мин шаккаттым! Шул темпта дәвам ит! Уңышлар сиңа!» – ди Басков, Зәйнетдинның кулын кысып.
Зәйнетдинның Россия артистының бәясенә күңеле үсенеп киткән. Аны тамашачысы да «Син – «текә», «Мондый башка юк, иң «текәсе», «Горурланам синең белән», «Башкорт мәдәниятен нәкъ менә син тәкъдим итүеңә шатмын», «Мондый артисттан югары бәя алу, бу – уңыш» дигән комментарийлар белән хуплаган.
Видео Заһир Зәйнетдиновның социаль челтәрдәге сәхифәсеннән.
