«Нигә концерт билетлары кыйммәт»: җырчылар радиода җыр әйләндергән өчен күпме түли?

Радиоларга җырларын «әйләндерү» (ротация) һәм телевидениедә күренер өчен, җырчылар акча түли. Моны инде «Интертат» укучылары беләдер, шуңа күрә «нигә һаман шул бер җырчының җырын әйләндерәләр, моны бит беркем тыңламый» дип сукранса да, сәбәбе аларга билгеледер. 

Радиоларның ротация өчен кыйммәт соравы хакында җырчылар интервьюларында гел искә ала. Әмма беркемнең дә төгәл саннар атап сөйләгәне юк. Шулай ук кайсы радио яки кайсы телеканал күпме сораганын да әйтмиләр. Бу аңлашыла – аларга әле алга таба да эшлисе, мөнәсәбәтләрне берсенең дә бозасы килми. Кыйммәт булса да, зарлана-зарлана булса да түлиләр.

Радио һәм телеканаллар үзләре дә әйтми. «Коммерция сере», акча, билгеле булганча, тынычлыкны ярата. Бу мәгълүмат ачык чыганакларда юк. 

Бер көнне танылган җырчыларыбызның берсе белән шул хакта сөйләшеп киттек. Тамашачыларның: «Нигә концертларга билетлар кыйммәт?» – дигән сораулары күңеленә тигән икән. «Соң 300 сум итә алмыйм бит инде билетларны. Ашыйсы да килә, киенергә дә кирәк. Аннан соң, җырчы булгач, матур булып та йөрисе килә. Макияж, чәчкә прическа ясау, костюмнар, төркемгә акча түләү – болар барысы да минем өстә. Популярлыкны арттырыйм дисәң, радио белән телевидение акчалар сорый», – дип сөйләде ул.

Бу җырчы Татарстандагы бер бик популяр шәхси радиода һәм телеканалда тәкъдим ителгән «прайс»ны «Интертат»ка күрсәтте. Кызганыч, белешә башлагач, прайсның 3 ел элекке икәне ачыкланды. Ул вакыттан соң бәяләр тагын күпме арткандыр. Әмма җырчыларның чыгымнарын күзалларга мөмкинлек бирә.

«Интертат» журналисты, прайс белән танышкач, «Ротация бәяләренең иҗатка тәэсире» дигән кандидатлык диссертациясе якларга кирәк икән, дигән нәтиҗәгә килде. Әмма моның өчен җырчылардан мәгълүматлар кирәк шул. Шуңа да, әгәр җырчыларның радио-телевидение сораган акчалар турында уртаклашасы мәгълүматлары булса, бик рәхмәтле булыр идек. Кыскасы, языгыз безгә! Анонимлыкны гарантиялибез (бу урында – күз яшьләре аша елмайган смайлик).