«Нигә бозарга?» – Дилә Нигъмәтуллинаның Эльмира Сөләйманова җырын башкаруын ошатмаганнар
2 октябрь көнне Чаллының Сара Садыйкова исемендәге концертлар залында Эльмира Сөләйманова истәлегенә оештырылачак концертта Дилә Нигъмәтуллина җырчының «Дуслар китә» җырын башкарачак.
«Эшләр буенча йөгерәбез, параллель рәвештә җыр сүзләре өйрәнәбез. Эльмираның бик моңлы җырын башкарачакмын, дуслар. Эльмира кебек үк җырлап булмый, әлбәттә. Аның уникаль тавыш иде. Шулай да тырышып карыйбыз.
Бу җырны Эльмира Вәсилә Фәттаховага багышланган концертта җырлаган иде. Хәзер инде үзе дә юк, җырның авторы Гөлназ Даутова да бакыйлыкка күчте», – дип сөйләгән ул бу турыда.
Әлеге җырның бер өзеген социаль челтәрдәге сәхифәсенә куйгач, Дилә Нигъмәтуллина бер тамашачысы тарафыннан тәнкыйтькә дучар булган. «Коточкыч тавыш, нигә аның җырларын бозарга?» – дип ачуланганнар Диләне.
Дилә Нигъмәтуллина да югалып калмаган, бу смсны халык алдына чыгарып: «Бу кеше безнең концерт администраторы вакансиясе белән кызыксынган иде. Һәм ул эшнең төп шарты – минем иҗатны ярату…» – дип язып калдырган.
