Тарихка күз салсак, бигрәк тә Кәгъбәтуллаһ тарихын өйрәнә торган китапларга мөрәҗәгать итсәк, без Кәгъбәнең һәрвакытта да кара төсле тукыма белән генә түгел, башка төсле тукымалар белән дә каплануын белербез. Гарәфә көне алдыннан Кәгъбәтуллаһны кызыл җәймә белән каплаганнар. Бу турыда «Хозур дин турында» телеграм-каналы хәбәр итә.
Рәҗаб аеның беренче көнендә Кәгъбәгә Кабати дигән тукымадан япма кидергәннәр, ә Рамазан аеның 27 нче көнендә ак япма белән каплаганнар. Фатимидлар идарә иткән чорда һәрдаим ак төсле япма кулланылган. Солтан Мәхмүт Сабук Текин Кәгъбәне сары төстәге җәймә белән капларга куша. Аббасид хәлифе Насыйр идарә иткән чорда Кәгъбәне яшел җәймә белән каплаганнар. Шул ук Насыйр хәлиф заманында Кәгъбәтуллаһны кара төсле җәймә белән каплый башлаганнар. Һәм бу традиция бүген дә дәвам итә.
Димәк, нәтиҗә ясап шуны әйтә алабыз: Кәгъбәтуллаһ өстендәге япманың кара төстә булуы ниндидер дини таләп түгел, ә төрле чорлардан сакланып калган йола гына, диелә хәбәрдә.