Ни өчен «Ак Барс» кайвакыт иртәнге тренировкаларын бозда үткәрми?

«Ак Барс» – «Автомобилист» плей-офф сериясенең дүртенче уены Казан файдасына тәмамланды. Командаларның 2 уены – Екатеринбургта, ә икесе Казанда узды. Ике команда исәбендә дә – икешәр җиңү.

Иң беренче матчта «Ак Барс» җиңгән иде, ә 28 һәм 30 март көннәрендә «Автомобилист» өстен чыкты. Казан командасы җиңелгән көннәрне, баш тренер аларны иртәнге боздагы тренировкадан ял иттергән иде. Журналист Александр Пшеничный үзенең телеграм-каналында моның турында фикере белән бүлеште, ул болай дигән иде: «Уенның икенче яртысына гына уянабыз». Чыннан да, оттырган 2 уенда «Ак Барс» беренче периодта голлар керттереп башлады, аннары икенче-өченче периодларда гына үзләре алка кертте. Матбугат конференциясендә «Ак Барс»ның баш тренеры Әнвәр Гатиятуллин иртән боздагы тренировкаларны уен соң башлана торган көннәрне үткәрүләре турында әйтте. Иртә башлана торганнарында (17:00), хоккейчыларга яңадан көч тупларга вакытлары аз калу сәбәпле, иртән команданы бозга чыгарып тормауларын аңлатты.

Узган җиңелүдән соң Әнвәр Гатиятуллин «киләсе уен иң мөһиме була» дигән иде. Бу мөһим уенда «Ак Барс» җиңә алды һәм «Автомобилист» – «Ак Барс» каршылыгында исәпне тигезләде.

Кичәге уенны Казан командасы активрак башлады. Беренче 10 минутта ук көндәш капкасына 4 алка кертеп куйды.

Матчтагы голлар, кагыйдә бозулар турында тулырак.

Җанатарлар да уен башыннан бертавыштан «Ак Барс!», «шайбу!», «забивай!» дип, команданы алга этәреп торды. «Ак Барс»ның баш тренеры матбугат конференцияләрендә бик еш җанатарларның мөһим роль уйнавы турында әйтә һәм аларга рәхмәтләр белдерә.