«Әни, мин куркам». Яшь әни өч яшьлек кызын балконнан чыгарып ыргыткан
Хатын баланы бишенче каттагы тәрәзәдән чыгарган һәм майкасыннан гына тотып торган, аннары төшереп җибәргән.
Самара шәһәрендә 24 яшьлек хатын 3 яшьлек кызын тәрәзәдән тотып ыргыткан. Бала һәлак булган. Бу турыда РЕН ТВ хәбәр итте.
8 июньдә Самараның Октябрь районында әни кеше бишенче кат балконыннан баласын урамга ыргыта. Социаль челтәрләрдә чыккан кадрларда баланың елавы, «биеклектән куркам» дип әйтүе ишетелә. Хатын баланы тәрәзәдән чыгара һәм майкасыннан тотып тора. Ләкин кием чыдамый, ертылып китә һәм бала асфальтка килеп төшә.
Күрше хатыны сүзләренчә, гаилә начар кебек тә булмаган. «Алар кызы белән икесе генә яши иде бугай. Гадәти кеше иде кебек. Без лифтта очрашкаладык. Безнең каршыда баласына кычкырмады», — ди ул.
Фаҗига булган көнне күрше хатыны кычкырган тавышлар ишеткән.
Җинаять вакытында хатын исерек булган дип фаразлана. Җинаять эше ачылган, хатынны тоткарлаганнар, диелә хәбәрдә.