Ни өчен Юпитер планетасы фотоларда буй-буй полосалы булып күренә?
Гигант планетада да Җирдәге кебек үк циклоннар һәм антициклоннар бар.
Юпитер буй-буй полосалы булып күренүнең сәбәбен Россия Фәннәр академиясенең Космик тикшеренүләр институты директоры урынбасары Олег Кораблев РИА Новости сайтына интервьюда аңлаткан.
Төрле юнәлештә хәрәкәт итүче һәм катлаулы атмосфера агымнары күп булу сәбәпле, Юпитер планетасы буй-буй булып күренә икән.
«Юпитер атмосферасында аңа төс бирә торган катнашмалар бар. Анда бик катлаулы атмосфера агымнары бара. Бу күренешләр Җирдәгегә охшаш, тик Юпитерда циркуляция күзәнәкләре бик күп», — дип аңлаткан галим.
Нәкъ менә шуңа күрә планета буй-буй булып күренә. «Агымнарның һәрберсе төрле якка хәрәкәт итә, аларның чикләрендә бормалар барлыкка килә, алар Җирдәге циклоннар һәм антициколоннарга охшаган», — ди ул.
Галим сүзләренчә, гигант планетадагы бормаларның иң билгелесе — Зур кызыл тап. Ул Җирдәге циклоннардан аермалы буларак, бик тотрыклы һәм аның гомер озынлыгы йөзләрчә ел белән исәпләнә, диелә хәбәрдә.