Ни өчен кешеләр ковидтан прививка ясаткач, авырый?
Вакцинация узгач та битлек киеп йөрү һәм социаль дистанция саклау хәерле.
Уфа табибы ковидтан вакцинация узгач, чир ияртү сәбәбен аңлатты. Бу турыда «Комсомольская правда» хәбәр итте.
Прививка — авырудан гарантия түгел, ул чир катлаулы формада булмасын өчен кирәк.
Дөм ковид-госпитале табибы Фәнил Шәмигулов сүзләренчә, кешеләр коронавирустан вакцинациядән соң, еш кына авыру йоктыра. Аеруча беренче компонентны керткәч. Табиб сүзләренчә, пациентларның күбесе прививкадан соң авыру йокмый дип ышана, ләкин бу алай түгел.
«Мәсәлән, кеше беренче компонентны ясатты, ди. Анда иммунитет җавабы өч атнадан соң гына формалаша, бу вакытта организм аеруча бирешүчән була. Ягъни антитәнчекләр әле барлыкка килмәгән, ә кеше җәмәгать урыннарында йөри, әле битлек тә кими. Прививка ясаткач, сакланган, дип саный. Тик бу алай түгел», — ди Шәмигулов.
Табиб искәрткәнчә, кеше вакцинацияне тулысынча узгач кына сакланган була. Хәтта аннан соң да битлек кияргә, социаль дистанция сакларга кирәк, диелә.