– Исәнмесез! Нәрсә борчый сезне? – дип кызыксынды табиб, бүлмәсенә керүгә.
– Сезгә сорауларым бар иде. Нәрсәдән башлыйм икән?
– Алай күп булгач, кайсыннан башласагыз да була, – диде табиб, бераз елмаеп.
– Менә нәрсәне беләсем килә: миңа ярманың кайсын ашарга ярый?
– Ничек инде, кайсын? Кайсын яратасыз – шунысын ашагыз, – диде табиб, аптырабрак калып.
– Юк шул, Интернетта язалар бит: «Зыяны бар, табиб белән киңәшегез!» дип, шуңа күрә нинди ярма ашарга да белгән юк.
– Хм... – дип, табиб уйга батты. – Ярманың барысы да файдалы. Сез бит көн саен бер ризык ашамыйсыздыр?
– Юк ла, шуңа кызыксынам.
– Алай булгач, барысын да ашарга ярый. Курыкмыйча ашагыз. Тагын нинди сорау?
– Яшелчәнең кайсын ашарга ярый?
– Бөтенесен рәхәтләнеп ашагыз!
– Ә менә интернетта язылган: «Зыяны күп, табиб белән киңәшергә кирәк» дип.
– Яшелчәнең бөтенесе файдалы, ниндиен ашасагыз да була. Инде беттеме?
– Юк, тагын соравым бар...
– Бу юлы нәрсә?
– Җиләк-җимешнең кайсысы файдалы, кайсысы зыянлы?
– Нормасын белебрәк ашасагыз, файдалырак икәнен исегездә тотыгыз! Зыянлы дип язылганмы интернетта?
– Әйе шул. Хәзер нәрсә ашарга белмәссең. Ите дә зыянлы, ярмасы да...
Барысы турында табиб белән киңәшергә тәкъдим ителә.
– Әһә... Димәк, интернетта еш утырасыз. Йокыгыз да качкандыр?
– Йокы турында күптән онытылды инде. Бар нәрсәне карап чыкканчы таң ата. Блогерлар төрле киңәш бирә. Бусы ярый, бусы ярамый. Баш каткан.
– Алай булгач, сезгә менә нәрсә киңәш итәр идем. Интернетта күп утырмагыз. Йокыгыз да рәтләнер. Әлегә бер дару язам. Йоклар алдыннан эчәрсез!
– Рәхмәт яусын, – дип, сөенеп чыгып киттем.
Юлда даруханәгә кереп, табиб язган кәгазьне сузам.
– Ул дару бездә юк әлегә, – диде чибәр кыз. – Аның урынына икенче дару тәкъдим итә алабыз. Аннан, безнең бүген күп даруларга акция. Арзан бәяләргә алып була.
– Табиб белән киңәшәсе түгелме?
– Юк. Бәясе арзан вакытта алып калыгыз.
Үгетләүләренә һәм акциягә игътибар итмичә, булмаган дару урынына кирәген генә алдым.
Өйгә кайтып укысам, берәр зарары юк микән дип. Язылган: «Файдасына караганда зыяны күбрәк икән: аллергия реакциясе булырга мөмкин, эч авырту, баш әйләнү, йоклый алмау, күз күреме начараю, кома, клиник үлем...»
Менә шуннан соң исән калып карагыз, дусларым!