Намаз укырга өйрәнергә теләүчеләрне «Ислам. Беренче адымнар» дәресләренә чакыралар

Татарстан мөселманнары Диния Нәзарәте намаз укырга һәм Ислам дине нигезләренә өйрәтүче «Ислам. Беренче адымнар»ның 18 нче сезонына тыңлаучылар җыя башлады.

Укулар 2026 елның 3 октябрендә башланачак. Шәкертләр кыска вакытлы популяр курс дәвамында – 8 дәрес эчендә (атнага бер тапкыр) – намаз укырга һәм Ислам дине нигезләренә өйрәнә алачак. Дәресләр – түләүсез. Курсларга язылу башланды, дип хәбәр итә ТР Диния нәзарәте матбугат хезмәте.

Беренче кереш дәрес 2026 елның 3 октябрендә Нәзарәт бинасында (Габдулла Тукай ур., 38 йорт) 8:00 сәгатьтә узачак. Дәресләрне мөфтиятнең волонтер яшьләр хәрәкәте вәкилләре алып барачак. Аерым алганда, «Ислам. Беренче адымнар» проектында катнашучыларны мөселман кешесе өчен иң төп белемнәр белән таныштырачаклар.

Ислам динендә беренче адымнарын ясаучылар – ир-атлар һәм хатын-кызлар һәр атнаны шимбә көнне 09.00 сәгатьтән 12.00гә кадәр Казанның Галиев мәчетенә (Габдулла Тукай ур., 40 йорт) җыелачак. Ир-атлар һәм хатын-кызлар өчен дәресләр аерым узачак. 17 яшь һәм аннан өлкәнрәк укучыларны көтеп калалар. Укулар татар һәм рус телләрендә алып барылачак.

Соңгы дәрес – 28 ноябрьдә – ул көнне Коръән мәҗлесе, курсларга йомгак ясау, сертификатлар тапшыру көтелә.

Курсларда катнашу өчен сылтама буенча кереп теркәлергә яки +7 (843) 237-86-18 телефоны буенча шалтыратырга кирәк.