Нәсимә апа Садыйковадан җомга көнгә тәбикмәк пешерү рецепты
Җомга көнне таба исе чыгарыйк, тәбикмәк пешерик, ди ул, рецепты белән бүлешеп.
Нәсимә апа Садыйкова үзенең Facebook битендә һәрдаим милли ризыкларыбызның рецептлары белән бүлешә, аларны пешереп тә күрсәтә.
Тәбикмәк өчен кирәк булган продуктлар: 1л сөт, 2-3 йомырка, 4-5аш кашыгы сыек май, 2 аш кашыгы шикәр комы, 1чәй калагы тоз, 1чәй калагы өеп чи чүпрә, он,
Эш тәртибе: Башта чүпрә куябыз: чүпрәгә ярты стакан җылы су, 1 чәй калагы шикәр комы, 2-3аш кашыгы он кушып, яхшылап болгатасың да җылы урынга куясың, күбекләнеп күтәреләчәк.
Камыр ясау: Сөтне җылытасың, шуңа тоз, йомырка, әзер чүпрәне, шикәр комы, сыек майны салып болгатабыз, шуңа он салып, төерләре беткәнче, куе кибет каймагы куелыгына җиткереп болгатабыз да, җылы урынга кабарырга куябыз. Берәр сәгатьтән кызган табага әз генә май салып пешерәбез.
Май беренче табага гына салына, аннары майсыз пешерелә дә, соңыннан эретелгән сыер мае белән майлана.
Тәмле булсын!