Музыкант Андрей Макаревич качып кына дүртенче тапкыр өйләнгән
Коронавирус аркасында, яшь хатын Израильдә, кияү исә Мәскәүдә калган.
Былтыр декабрь аенда Андрей Макаревич дүртенче тапкыр өйләнгән. Бу турыда НТВ каналы хәбәр итте.
Берничә ай узгач кына, 66 яшьлек артист яңа хатыны турында сөйләгән. «Машина времени» төркеме лидеры яңа мәхәббәт табу бәхетенә ирешүенә сөенә.
Аның дүртенче хатыны Эйнат исемле яшь кыз, ул яһүди. Гашыйклар зур тантаналар ясап тормаган, тыйнак кына өйләнешкәннәр. Тантана Израильдә булган. «Яшь, матур, акыллы. Туй булмады. Мин андый әйберләрне яратмыйм. Якыннар гына җыелышып эчтек. Пафос ясап тормадым», — ди Макаревич.
Яшь хатын хәзер Израильдә, Макаревич исә Мәскәүдә изоляция режимында яши. Эйнат ире янына килергә тиеш булган, тик рейслар ябылган. Хәзер яшь гаилә видеоэлемтә аша аралаша, диелә хәбәрдә.