Мунчада ис тиеп, берьюлы өч ир-ат үлгән

21 гыйнварда төнге берләр тирәсендә Уфада өч ир-ат мәете табыла. Бу турыда «Башинформ» агентлыгы хәбәр итте.

«Башкортстан чәчәкләре» коттеджлар бистәсендә мунчада ир-атлар һәлак була. Башлангыч фаразлар буенча, бу кешеләргә ис тигән булуы ихтимал.

Мәрхүм ир-атлар Уфага Омскидан килгән булган. Алар биредә эшләгән.

«Өч кеше мәетен табу факты буенча, тикшерү бара. Фаҗиганең ничек килеп чыкканы ачыклана. Аларның ни сәбәпле үлүен ачыклау өчен судмедэкспертиза билгеләнде», — дип сөйләгәннәр агентлыкка республика буенча Тикшерү комитеты идарәсендә.