Мотоузышлар буенча Россия чемпионы Түбән Камадан Уфага барганда авариядә һәлак булган

Бозда мотоузышлар буенча 8 тапкыр Россия чемпионы Николай Красников Башкортстанда һәлак булган. Бу хакта республиканың спорт министры Руслан Хәбибов үзенең Telegram-каналында хәбәр иткән, дип яза «Татар-информ».

Ул спортчының гаиләсе һәм якыннарының кайгысын уртаклаша.

«Бу – илебез мотоспорты һәм безнең барыбыз өчен дә зур югалту», – дип язган төбәк министры.

Спортчы Кушнаренко районында авариядә һәлак булган. Төнлә трассаның 69 нчы чакрымында «Лада Гранта» машинасы белән каршы яктан килүче «ГАЗель» һәм «Sitrak» йөк машиналары бәрелешкән. Юл-транспорт һәлакәтендә җиңел машина йөртүчесе «ашыгыч ярдәм» килгәнче вафат булган. Спортчыга 40 яшь булган, диелә хәбәрдә.

«Челнинские известия» белешмәсе буенча, Красников Түбән Камадан Уфага таба бара торган була. Төнге 3ләр тирәсендә аның автомобиле каршы як полосада йөк машинасы һәм «Газель» белән бәрелешә, диелә хәбәрдә.