Мордовиядә күпер коймасына бәрелгән иномарка уртага өзелгән мизгел видеога эләккән
Honda Integra белән идарә итүче 21 яшьлек егетнең машина йөртү таныклыгы да булмаган.
4 октябрьдә кичке алтылар тирәсендә Мордовиянең Саранск шәһәрендә юл һәлакәтендә 21 яшьлек егет үлгән. Машинада пассажир утыргычында бара торган 21 яшьлек кыз исән калган, аны хастаханәгә озатканнар. Бу турыда «Вести» каналы хәбәр итте.
Инсар елгасы аша күпердә фаҗига мизгелен күзәтү камерасы видеога төшереп торган.
Кадрлардан күренгәнчә, Honda Integra машинасындагы кеше идарәсен югалта. Автомобиль шуып китә һәм металл коймага барып бәрелә. Шуннан соң иномарка уртага өзелә.
Мордовия буенча ЮХИДИ хәбәр иткәнчә, авария урынында имгәнгән егет һәлак була. Аның машина йөртү өчен таныклыгы да юк.
Фаҗиганең сәбәпләре ачыклана, диелә бу хәбәрдә.
