Мөнир Рахмаевның хатыны Илсөяр социаль челтәрдәге сәхифәсендә каймак бәлеше рецепты белән уртаклаша.
Камыр өчен башта апара (ярты стакан суга бераз шикәр комы һәм он) ясарга, аннары 1 йомыркага бер чеметем тоз салып тугларга, йомшак атланмай, он салып камыр басарга. Камырны 20-30 минут ял иттерергә кирәк.
Эчлек өчен 3 йомырка, шикәр комы, каймакны яхшылап болгатырга. Камырны җәяргә, табаны майларга, камырны салырга, таба кырыйларына чыккан артык камырны кисеп алырга.
Бәлеш кырыен бизәкләү өчен, телемләп кисеп чыгарга һәм аларны бер-берсе өстенә куеп барырга. Әзер бәлешне 180 градуста 30-40 минут пешерергә.
«Соңыннан бәлешне бүлмә температурасына кадәр суытырга һәм төнгә суыткычка куярга. Чизкейк кебек тәмле булачак. Мин яратканча, юка камырлы, күп эчлекле каймак бәлеше килеп чыга», – ди блогер.
