Җырчы Зәйнәб Фәрхетдиновага үзенең язылучыларын аз гына булса да юмор, шаяруның нәрсә икәнлеген аңларга өйрәтергә кирәк бугай. Җырчыдан һәрвакыт позитив бөркелеп тора, ул үзенең социаль челтәрдәге сәхифәсен дә шундый рухта алып бара. Шушы көннәрдә ул блогына тормыш иптәше Зөфәр Билалов белән бик матур итеп заманча биегән видеосын куйган иде. Әмма Зәйнәб Фәрхетдинова, үзен мондый образда кабул итә алмаучы язылучылары тарафыннан, беркадәр тәнкыйтькә юлыккан.
«Нишлиләр соң болар? Мондый бию буламыни?»; «Нәрсә бу? Аңламадым»; «Зәйнәб олыгаерга уйламый да»; «Яшьләрдән калышасы килми», – дип язып калдырганнар алар аңа.
Зәйнәб Фәрхетдинованың исә бу сүзләргә бер дә исе китмәгән.
«Шулай язачагыгызга, әйтәчәгегезгә шигем юк иде. Калышмыйм, чөнки минем булмышым шундый. Көе селкетә», – дип җавап кайтарган ул аларга.
Зәйнәб Фәрхетдинова белән Зөфәр Билаловның дәртле биюенә сез дә бәя бирегез әле: