Татарстанның атказанган артисты Лилия Муллагалиева үзенең зур борчуы белән бүлешкән иде. Җырчыда яман шеш тапканнар, һәм ул Санкт-Петербург шәһәренә операция ясатырга юл тотты.
Җырчы инде барып урнашкан. Ул хастаханәдән язылучылары, үзенә изге теләктә торучы дуслары белән элемтәгә чыкты. Артистның палатасы төбендә генә алмагач үсеп утыра, алмалары да өлгергән. Хастаханә янын акчарлаклар да үз итә икән. Берсе Лилия Муллагалиеваның тәрәзәсе төбенә дә килеп кунган.
«Ашарга килә икән бу акчарлак көн саен. Менә мин дә сыр белән сыйлыйм әле. Шундый зур акчарлак», – дип ашата ул аны. Ул арада, тәмле әйберне сизеп, тәрәзәгә икенчесе дә килеп куна. «Ияләшкәннәр инде алар ашатканга», – дип, дусты белән сөйләшкән кебек сөйләшә-сөйләшә кунак итә аларны Лилия Муллагалиева.
Җырчы үзенә яхшы теләкләр язган барлык кешеләргә рәхмәт сүзләре дә әйтә.
«Мин урнаштым, дуслар. Барыгызга да зур рәхмәт изге теләкләрегез өчен. Һәрберсен укып чыктым. Монда кемнәр генә юк. Барысын күрәсең дә, үз проблемаң читкәрәк күчә… Бу атнада тикшеренүләр узам, өстәмә анализлар алалар. Кайберсен кабатлап алалар. Тиздән яңадан биопсия тапшырачакмын. Шундый хәлләр, дуслар», – дип сөйләде ул сторисларында.
Җырчының исән-сау сихәтләнүен теләп калабыз.