![«Моң патшасы» Вадим Захаров үкенүләр турындагы яңа җырын радиога биргән](https://intertat.tatar/resize/shd/images/uploads/news/2023/7/8/0c79090f447cae6e9623d2761fda7135.jpg)
Радиода Вадим Захаровның «Бер елганың ике ярында» дип аталган җыры чыкты. Ул Сәүбән Чуганаев көенә, Фәннүр Сафин сүзләренә иҗат ителгән. Җыр кайтарып булмас көннәр, үткәннәрдә ясый алмаган адымнар, яшьлек үкенечләре турында. «Үткән көннәр кайтмый бит инде» дип җырлый Вадим.
Яңа җырны радио тыңлаучылар яратып кабул иткән. Социаль челтәрдә бу җырны тыңлаучылар «бик матур җыр», «искиткеч» дигән сүзләр язып калдырган.
Вадим Захаровның тавышына сокланып язучылар күп. «Шул кадәр күңелгә ятышлы моңлы тавыш. Бөтен җырларын үлеп яратам», «Ну, җырлап та куя инде» дигән комментарийлар очратырга була. Бер тамашачысы Вадим Захаровны «моң патшасы» дип тә бәяләгән.