Зәринә Хәсәншина «Мөмкин түгел сине яратмый» дип аталган яңа җырын тәкъдим итте. Җырчы бу җырга тап булу тарихын да язган.
«Күңел төшенкелегенә бирелеп йөргәндә, бер көн Гөлчәчәк апа язды. «Зәринә, бәлки, берәр җыр эшләрбез», – ди. Мин бөтенләй башка төрле җырга заказ бирдем. Гөлчәчәк апа матур сүзләр язып бирде. Инде шул җырны алам гына дигәндә: «Зәринә, минем иске телефонда Илназар көйләр язган җырлар ята. Әйдә, табып, аларны да җибәрим әле сиңа», – диде, һәм менә бу җыр килеп чыкты. Шунда ук Илназарга: «Теләсәң нәрсә эшлә, мин бу җырны башкарам!» – дидем. Иске телефонда югалып яткан җыр менә шулай барлыкка килде. Бу җыр сезнең күңелләргә дә хуш килер, дип уйлыйм», – дип язган ул.
Шулай итеп, җырның сүзләре авторы – Гөлчәчәк Садретдинова, көе – Илназар.