Җитди авырган, матди мөмкинлекләре булмаган яки тормыштагы мөһим мәсьәләләрен хәл итеп бетермәгән кешеләргә хаҗга бару киңәш ителми. Бу хакта «РИА Новости» агентлыгына Россия мөселманнары Диния нәзарәте рәисенең халыкара эшләр һәм хаҗ буенча урынбасары, мөфти Рушан Аббясов сөйләгән.
- Хаҗ – мөселманнар өчен гомерендә кимендә бер тапкыр үтәлергә тиешле фарыз гыйбадәт сәфәре. 2026 елда хаҗ 25 майда башлана, аның иң мөһим көне 26 майга туры килә. Корбан бәйрәме 26 майда кояш баегач башлана. 27 майдан соңгы өч көн дә бәйрәм көннәре булып санала, диелә «РИА Новости» хәбәрендә.
«Хаҗ аны үтәү физик һәм матди мөмкинлеге булган кешеләр өчен генә фарыз. Сәфәрне һәм хаҗ йолаларын имин рәвештә үтәүгә комачаулый торган җитди авырулары булган кешеләргә, шулай ук кирәкле матди мөмкинлекләре булмаган яки тормыштагы мөһим бурычларын хәл итеп бетермәгән кешеләргә әлеге каршылыклар юкка чыкканчы сәфәрдән тыелып торырга кирәк», – дигән Аббясов.
Мөфти сүзләренчә, Согуд Гарәбстаны билгеләгән рәсми квотадан тыш яки шикле юллар аша хаҗга бару да дөрес түгел.
«Бу законнарны бозып кына калмый, ә хаҗны тиешенчә үтәү мөмкинлеген дә куркыныч астына куя», – дип йомгаклаган ул.
Элегрәк Транспорт министрлыгы хәбәр иткәнчә, 2026 елда Россиядән хаҗга баручылар өчен квота 25 мең кеше тәшкил итә. Хаҗилар 5–21 май аралыгында Согуд Гарәбстанына оча, ә кире кайту рейслары 30 майдан 15 июньгә кадәр планлаштырылган.