Татарстанда мобилизацияләнүчеләр һәм аларның гаиләсенә каралган салым ташламалары турында «Челнинские известия» салым хезмәтенә сылтама белән хәбәр итте.
Салым хезмәте махсус хәрби операциядә катнашучы хәрби хезмәткәрләргә бирелә торган ташламалар турында искәрткән. Аларга мобилизацияләнүчеләр, үз теләге белән китүчеләр һәм контракт буенча катнашучылар керә.
Ел башыннан мобилизацияләнүчеләр, контракт буенча хезмәт итүчеләр һәм аларның гаилә әгъзаларының түләүсез алган акчалата һәм милек керемнәренә НДФЛ һәм иминият кертемнәре исәпләнми. Ягъни, аларга балаларны мәктәпкә әзерләү өчен бирелгән түләүләргә, мобилизацияләнүчеләргә кием-салым алу өчен бирелгән акчаларга, дару алу, хәрбиләргә экипировка тапшыру өчен бирелгән матди ярдәмгә һәм башкаларга салым түләргә кирәкми. Түләү чыганагы – эш бирүчеме яки муниципалитетмы – мөһим түгел.
Мобилизацияләнүчеләргә, контракт буенча хезмәт итүчеләргә һәм аларның гаилә әгъзаларына түләүсез бирелгән милеккә салым салынмый.
Тагын бер ярдәм чарасы – мобилизация буенча чакырылган шәхси эшмәкәрләрнең (ИП) патентлары автомат рәвештә озынайтыла. Бу чара быел 21 сентябрьдән соң барлыкка килгән хокукый мөнәсәбәтләргә кагыла. Шулай итеп, мобилизацияләнгән эшмәкәрләргә патент озайту өчен гариза язарга кирәкми, диелә хәбәрдә.