Мобилизацияләнгән ирне «дезертир» дип атаганнар, һәм хатынына түләүләр килми башлаган

Башкортстанның Белорет районы Абзак авылында мобилизацияләнгән ир-атның хатыны полициягә мөрәҗәгать иткән. Ул ирен «дезертир» дип санауларын һәм акчалата түләүдән мәхрүм итүләрен сөйләгән. Бу хакта newsbash.ru сайты яза. 

Ир-атны 2022 елның октябрендә мобилизацияләгәннәр, ә соңыннан ДНРга җибәргәннәр. Ул декабрь һәм гыйнвар өчен түләүләр алмаган, һәм хатыны Белореттагы хәрби комиссариатка мөрәҗәгать иткән. Ә анда аңа иренең «дезертир» булып саналуын әйткәннәр, шуңа күрә ярдәм итә алмаганнар. 

Иренең хәрби бурычын үтәве турында дәлилләре дә бар: аның фотосы һәм Россия Оборона министрлыгыннан белешмә. Гаделлеккә ирешергә теләп, ул Белорет районы прокуратурасына гариза язган. Ханым аның проблемасын мөмкин кадәр тизрәк ачыкларлар, дип өметләнә: аның кечкенә баласы бар һәм шәһәргә еш килеп йөрергә мөмкинлеге юк.

Бу хәлне Башкортстан башлыгы администрациясенең хәрби хезмәткәрләр белән эш итү мәсьәләсе буенча киңәшчесе Алик Камалетдинов та шәрехләде.

«Кызганыч, шулай була. Хәрби прокуратурага, Уфа гарнизонының хәрби комендатурасына мөрәҗәгать итәргә кирәк. Алар ачыклаячак. Кагыйдә буларак, военкоматта мондый мәгълүмат булмый, аларга җиткерәләр генә, факт алдында калдыралар», – диде ул.