Мисырда ял иткәндә машина бәрдергәч, Россиядән килгән хатын үлгән, ире имгәнгән
Әнисе үлгән, әтисе имгәнгән кызны кунакханәгә кайтарып торганнар. Әтисе дә якын арада кунакханәгә кайтачак.
Мисырда Россия туристларын машина бәрдереп киткән. Авариядә һәлак булган хатынның кызы ятим калган. Бу турыда РЕН ТВ хәбәр итте.
Фаҗига 31 августта Хургада һәм Каһирә шәһәрләре арасындагы трассада була. Бу турыда Россия илчелегенең Facebook челтәрендәге сәхифәсендә хәбәр ителә.
«Якынча белешмә буенча, 31 августта Хургададан Каһирәгә таба бара торган туристлар автобусы юл кырыена кыска вакытка туктап тора. Россиядән килгән ир белән хатынны йөк машинасы бәрдереп китә», диелә илчелек хәбәрендә.
Имгәнгән хатын урында ук үлә. Аның ире дә имгәнә. Ир-атны Суэц шәһәре хастаханәсенә илткәннәр.
«Ир-атның гомеренә җитди куркыныч янамау сәбәпле, якын арада аны кунакханәгә илтәләр. Зыян күрүче ир белән хатынның кызын да кунакханәгә кайтарып куйганнар», диелә туроператорлар берлеге хәбәрендә.