Минзәлә районында 28 яшьлек ир-ат әтисен үтергәнче кыйнап ташлаган
Исерек кеше белән сөйләшмәгез һәм бәхәсләшмәгез., дип кисәтә Татарстан буенча Эчке эшләр министрлыгы.
Минзәлә районының Коноваловка авылында яшәүче 28 яшьлек ир-ат әтисен кыйнап үтергән. Бу турыда Татарстан буенча Эчке эшләр министрлыгы матбугат хезмәте хәбәр итте.
Җинаятьтә шикләнелүче ир-ат беркайда да эшләми, моңа кадәр хөкем ителгән. Ул 61 яшьлек әтисе белән спиртлы эчемлекләр эчеп утыра. Бераздан ир-атлар талаша башлый. Яшьрәк ир-ат олырагын кыйный. Шуннан соң ата кеше урында ук җан бирә.
Әтисен үтергән ир-атны тоткарлаганнар. Аңа карата җинаять эше ачылган.
Татарстан буенча Эчке эшләр министрлыгы кисәтә: исерек хәлдәге теләсә-кайсы кеше агрессор булырга мөмкин икәнен истә тотыгыз, аның кәефе бик тиз үзгәрә, ул адекват түгел, үзен контрольдә тота алмый. Беркайчан да исерек кеше белән сөйләшергә тырышмагыз, бәхәсләшмәгез.