«Минем җир»: Авылда фермер хәрбине зиратта җирләргә комачаулаган, каберне кире күмдерткән

Башкортстанның Бүздәк районының Сабанай авылында җирле фермер махсус операциядә һәлак булган хәрбине авыл зиратына җирләргә комачаулаган. Бу хакта «Башинформ» агентлыгы яза.

Һәлак булган Рәсим Хәйруллинның туганнары сөйләгәнчә, аны авылга 18 августта алып кайтканнар. Якыннары, зират карап торучы кеше ризалыгы белән, геройны әтисе һәм әнисе янына җирләргә була. Тик кабер казуга җирле фермер – Фәнүз комачаулый, янәсе, ул җир аныкы. Җитмәсә, ул зиратка кешеләр алып килә һәм каберне кире күмеп куя. Бу низаг аздан гына сугыш белән бетми кала.

«Без зиратка килдек, ә анда Фәнүз басып тора, «Бу – минем җир, мин монда әниемне җирләячәкмен», – ди. Мин аңа: «Бу – безнең җир, монда минем әти-әни, әби, туганнарыбыз җирләнгән», – дим. Без сеңелләрем белән елап җибәрдек, ә улым мине яклый башлады. Ә Фәнүз аны сугышырга котырта башлады. «Әйдә, миңа көрәк белән сук», – ди. Миңа сукмакчы булды, теләсә нәрсә әйтте, мине «начар әни» диде», – дип сөйләгән журналистларга һәлак булган геройның апасы.

Бүздәк районы администрациясе «Башинформ» агентлыгына хәбәр иткәнчә, Сабанай авылында хәрби белән хушлашу 19 августта узган. Хәрбине соңга юлга озаткан вакытта фермер катнашында күңелсез хәл килеп чыгуын, аның хәрбинең кабер урынына дәгъва итүен алар да раслаган.

«Авыл администрациясе вәкилләре бу хәлгә тиз арада катнашты, аның гамәлләренең дөрес булмавын аңлаттылар. Ахыр чиктә, махсус операциядә катнашучыны алдан планлаштырылган урынга җирләделәр. Матәм чарасын уздыруга комачауларга теләгән фермерның гамәлләренә хокукый бәя бирү белән хокук саклау органнары шөгыльләнә», – диделәр администрациядә.