«Мин түзеп тормаячакмын!»: Миләүшә – Данир Сабировларның кызын укытучысы кыерсыткан

Миләүшә һәм Данир Сабировларның төпчек кызлары Данияне инглиз теле буенча өстәмә белем бирүче укытучысы кыерсыткан. Ул балага начар сүзләр әйтеп, дәрестән күз яшьләре белән чыгып китәргә мәҗбүр иткән. Әлеге күңелсез хәл турында Миләүшә Сабирова сторисларында сөйләде.

«Минем балаларым ярты елдан артык инглиз теле буенча Казандагы иң яхшы педагогларның берсендә шөгыльләнделәр. Без ул укытучыга аз акча түләмәдек, суммасын әйтеп тормыйм. Танышлар аша эләктек, безгә ул укытучыны тәкъдим иттеләр. Кызлар инглиз теле белән атнага 2 тапкыр шөгыльләнделәр.

Белем бирә ул, сүз дә юк. Балалар инглиз телен яхшырак белә башладылар. Ләкин кичә дәрестән соң Дания белән Мәрьям машинага чыгып утырдылар да, Дания калтырана-калтырана еларга тотынды. Ул хәтта сөйләшә дә алмады, юл буе елап кайтты. Минем баламның шулай елаганын беркайчан да күргәнем булмады.

Кайткач нәрсә булганын сораша башладым. «Мин укый алмадым», – диде. Әйе, бу очракта аның да гаебе бар, өйрәнеп бетермәгәндер. Мин бала яклы гына түгел. Ләкин укытучы аны дәрес буе интектергән. Ахырдан башка бер ханым килеп, Данияне кочаклаган да юата башлаган. Ә укытучы чыгып: «Син нигә елыйсың? Бар, кит моннан!» –дип, Данияне этеп җибәргән һәм аңа «иди в ж…!» дип кычкырган. Казандагы иң әйбәт укытучыларның берсе ничек шулай әйтә алган – башыма сыймый!

Минем балалар инде ничә ел спорт белән шөгыльләнә. Спортта тагын да кырысрак таләпләр. Ләкин бу – өстәмә түгәрәк, мин аның өчен акча түлим. Мин баламның башыннан сыйпап торуларын сорамыйм. Ләкин шундый мөгамәләне түзеп тормачакмын. Мин тавышланып йөрүләрне яратмыйм, гауга чыгармадым, әмма балаларымны ул укытучыдан алдым», – дип аңлаткан Миләүшә.