«Мин моның өчен үтерер идем»: 83 яшьлек әбине чәнчегән наркоман хатынга хөкем чыгарылды

Татарстан Югары суды шәфкать туташы Эльвира Рәхмәтуллова эшенә нокта куйды. Хатын-кызны ярдәмгә мохтаҗ булган кешене үтерүдә һәм урлауда гаепле дип тапканнар. Аңа ун ел ярым гомуми режимлы колониядә җәза билгеләнгән.

Рәхмәтуллова, үзенә сүз бирелгәч, судьядан үзенә максималь каты җәза билгеләүне һәм аны кызганмавын сорый.

«Минем җинаятемне аклап булмый. Минималь җәза срогы да сорамыйм. Мин бик үкенәм һәм, әгәр бу миңа үз гаебемне капларга ярдәм итсә, мөмкин булган иң зур срокны сорыйм. Көн саен мин 1 ел элек булган вакыйгалар турында уйлыйм. Мин күңелемә җиңелрәк булуын телим. Минем гамәлләрем аркасында әтием үлде, әниемне һәм кечкенә кызымны калдырдым», – диде Эльвира Рәхмәтуллова.

Рахматуллова, бу хәлнең иң уңай ягы дип, төрмәдә наркотиклар куллана алмаячагын атады.

«Мин – наркоман. Хәзер мин иректәге башка кешеләргә зыян китермәвемә шатмын. Минемчә, минем урыным –- төрмәдә, мин эшләячәкмен һәм әниемә дистанцион рәвештә ярдәм итәчәкмен. Әгәр минем әниемне үтергән булсалар, мин, үтерүчене табып, аны үтергән булыр идем, аннары төрмәгә утыртылган булыр идем. Мин кылган гамәлләрем өчен гафу үтенәм», – дип тулыландырды Эльвира Рәхмәтуллова.

Суд Рәхмәтуллованың СИЗОда утыру вакытын хөкем срогына кертә, шуңа күрә аңа 9 елга якын төрмәдә утырырга кала. Узган елның октябрендә Яңа Савин суды Эльвирага хөкем карары чыгарды һәм аңа 11 ел төрмә җәзасы билгеләде. Шуңа бәйле рәвештә ТР Югары судының закон буенча хатын-кызны 11 елдан артык ирегеннән мәхрүм итү хокукы булмаган.

«Мескен әбинең муенын 7 тапкыр кистем»

Бульхиннар гаиләсендә фаҗига узган елның май ахырында була. Анастасия Бульхина, ире белән бергә, хезмәтләр сайтында Эльвира Рәхмәтуллованың анкетасын таба. Ул 83 яшьлек әнисе Анастасияне алар киткән вакытта карарга ризалаша.

Ир белән хатын сәяхәттән кайткач, әниләре янына киләләр. Ләкин гаилә башлыгы фатирга керә алмый. Ул фатирга тәрәзәдән генә үтеп керә ала һәм коточкыч күренешне күрә: Рәхмәтуллова йоклый, аның янында канлы пычаклар ята. Күрше бүлмәдә хатынының әнисе суелган килеш ята. Экспертиза күрсәткәнчә, Эльвира наркотиклар тәэсирендә булган. Гаилә шунда ук «ашыгыч ярдәм» һәм полиция чакырта, ә үтерүчене фатирда биклиләр.

«Ирем озак вакыт фатирга керә алмады, әмма ишек артында шалтырату тавышлары ишетте. Ул сакчыга төшеп, хәлне аңлатты. Сакчы, баскыч алып, фатирга тәрәзә аша керергә рөхсәт итте. Берникадәр вакыттан соң ирем ишектән чыгып, миңа «кермәсәң, яхшырак булыр» дип әйтте. Ул «ашыгыч ярдәм» һәм полиция чакыртырга кушты», – дип сөйли Анастасия Бульхина фаҗига көне турында.

Ачыкланганча, Рәхмәтуллова карт хатынның муенын 7 тапкыр кисеп, трахеясын зарарлаган. Тикшерү Рәхмәтуллованың өлкән яшьтәге хатынны аңлы рәвештә үтергәненә ышана.

«Көнләшеп, бергә яшәүче хатынга бирелгән акчаны урладым»

Урлау эпизоды үтерү белән бәйле түгел. Ул Бульхиннар гаиләсе белән булган вакыйгаларга кадәр 1 ел элек булган. Тикшерү ачыклаганча, Эльвира, алкоголизм һәм хатын-кызлар белән бергә яшәү сәбәпле, ата-ана хокукыннан мәхрүм ителгән. Бер сөяркәсе белән ул вакытлыча Херсон өлкәсенә яшәргә китә. Бу хатыннан көнләшеп, акча урлый.

«Мин бергә яшәүче хатынның хезмәттәшен көндәш дип санадым. Көнләшүнең соңгы тамчысы – ул аңа банк счетыннан файдаланырга рөхсәт итте. Ул аларның икесенә бер иде. Мин аннан көнләштем һәм аның акчасын үземнең картага күчердем, якынча 400 мең сум. Минем бергә яшәгән дустым акча урлауда катнашмады. Ул яхшы кеше иде, миңа наркоманиядән дәваланырга ярдәм итәргә тырышты. Күптән түгел ул вафат булды», – дип сөйләде Рәхмәтуллова узган утырышларда.

Херсон өлкәсеннән Эльвира туган ягына – Татарстанга кайта. Көнлек түләү белән теләсә нинди эшкә, шул исәптән гомуми туклану өлкәсендә дә эшләп ала. Шул вакытта аның әнисе белән конфликт кискенләшә һәм наркоманиясе дә көчәя. Ул берничә көнгә арендаланган фатирларда яши һәм күченеп йөри, элек бергә яшәгән хатынның акчасы ул вакытта инде беткән була.

Бу вакытта ул интернетта авыру әбине караучы эзләү турында белдерүне күрә. Көндәлек түләү, фатирда яшәү, ашау мөмкинлеге дә бар – бу бик яхшы вариант була. Әби аңа шунда ук ошый. 83 яшьлек пенсионер әби карауга мохтаҗ, йөри алмый, ләкин игелекле һәм мәрхәмәтле кеше була. Татар җырларын ярата. Эльвира кабат элеккеге эшләренә кайтканчы, бу – идиллия кебек була.

«Татар-информ»нан Дмитрий Шатров язмасы тәрҗемә ителде