«Мин, әнием, сиңа бурычлы» – Айдар Тимербаевның әнисенең туган көне

Шул уңайдан композитор социаль челтәрдәге сәхифәсендә әнисен тәбрикләп, бик мәгънәле шигырь юллары белән уртаклашкан:

Рәхмәт, әни, тудырганың өчен,

Төн йокламый мине бакканга.

Сабырлыгың белән күңелемә

Иман орлыклары салганга.

Рәхмәт, әни, дөрес тәрбияңә

Минем өчен янып-көйгәнгә.

Авызыңнан өзеп, ашамыйча

Соңгы телемеңне биргәнгә.

Рәхмәт, әни, кулларыңны сузып

Бәхет теләп кылган догаңа.

Киңәш-табышыңны кызганмыйча

Фатыйхаңны биреп торганга.

Синең өчен, бары синең өчен

Рәхмәтемнең иң-иң олысы.

Гомеремнең һәр мизгеле саен

Мин, әнием, сиңа бурычлы!

Айдар Тимербаевның бик күп хезмәттәшләре, виртуаль дуслары да изге теләкләрен ирештергәннәр. Күңелләрне, бәгырьләрне айкый торган җырлар иҗат иткән композитор тудырган, үстергән анага сәламәтлек, балалар игелеге, оныклар куанычы, күңел тынычлыгы, озын гомерләр теләгәннәр.

«Бик бәхетле кеше син, Айдар!», «Әниегезгә охшаган икәнсез», – дип комментарий калдыручылар да бар.

Сүз уңаеннан, кичә Яр Чаллы шәһәрендә Айдар Тимербаев җырларыннан төзелгән зур концерт булган. Анда бик күп популяр артистлар катнашкан.