Миллионнан артык язылучысы булган 18 яшьлек блогер кыз Балида һәлак булган
Настя Тропицель фриланска багышланган сәхифә алып барган.
18 яшьлек Настя Тропицель — Россиядә популяр блогер кыз, аның 1,1 миллион язылучысы бар. Ул Балида һәлак булган. Бу турыда РИА Новости агентлыгы хәбәр итә.
Настяның Instagram челтәрендәге аккаунтында соңгы язманы әнисе язган. «Кызганычка каршы, безнең белән Настя юк инде. Мин моңа ышана да алмыйм. Әнисе», — диелгән бу язмада.
Комментарийларда кызның Балида мотоциклда йөргәндә һәлак булуын әйтәләр.
Настя Тропицель фриланска багышланган блог алып бара, ул интернетта акча эшләү, үз-үзеңне тәрбияләү турында язмалар куя. Настяның сүзләренчә, ул беренче миллион сум акчасын 15 яшендә эшләп тапкан, диелә хәбәрдә.
Настя бер атна элек «Карантин беткәч» дигән пост куйган. Геолокация буенча кадрларның Балида төшерелгән булуы аңлашыла.
Пост янындагы комментарийларда Настяның көндезге икләрдә һәлак булуын әйтәләр, «Байкта барганда идарәсен югалткан», диләр.
Балида булган авария кадрлары «Вести» каналы сайтында чыкты. Настя мотоциклны күптән түгел генә алган, ул байкны социаль челтәрләрдә дә күрсәткән, диелә бу хәбәрдә.