Бакчада яшелчә өлгергән вакыт. Хуҗабикәләр кышка запас ясап калырга ашыга. Данир Сабировның хатыны Миләүшә социаль челтәрләрдә өй шартларында тәмле кетчуп ясарга өйрәткән.
Кетчуп өчен: 1 кг суган, 4 кг помидор, 4-5 штук татлы борыч, 1-2 ачы борыч, 0,5 кг алма, 1 сарымсак, 4-5 дәфнә яфрагы (лавр), 2 аш кашыгы тоз, 10 канәфер (гвоздика), 200-350 грамм шикәр комы, 1 стакан аш серкәсе, 6 түгәрәк кара борыч, 6 хуш исле борыч,1 бал калагы дарчин (корица).
Яшелчәләрне уртача зурлыкта турарга һәм 2 сәгать уртача утта пешерергә кирәк.
Аннары иләк аша үткәрергә, әлеге массаны кайнатып чыгарырга һәм, банкаларга тутырып, тимер капкач белән ябарга.
«Кетчупны балалар да ашаса, ачы борыч салмагыз», – дип киңәш итә Миләүшә Сабирова.