Миләүшә Русланны чәчен йолкый-йолкый кыйный: Руслан Кираметдинов яңа җырын тәкъдим итте

Руслан Кираметдинов та мәтрүшкәләр турында җыр җырлый башлаган. Тик иҗат җимешен тәкъдим итү ысулын гына ул үзенчәлекле итеп сайлаган: мәтрүшкәләр тоткан Русланны Миләүшә кыйный.

«Мәтрүшкәләр» җырына мини-клипны Кираметдинов шәһәр урамнарында төшергән. Җырчы урамнарга чыгып җырлар алдыннан, видеоның беренче өлеше базарда башлана. Анда Руслан «татар мәтрүшкәләре» сата, ә «Башкорт хуҗабикәсе» исеме белән танылган Миләүшә Шәйхелисламова «башкорт мәтрүшкәләре»н кыйммәтрәк бәягә сатмакчы. Ике сатучы арасында Руслан әйткән «әби» сүзе аркасында сугыш башлана: Миләүшә Русланны сикерә-сикерә кыйный, чәчләреннән тарта.

Бу видеоны җырчы белән блогер гадәти базарда төшергән. Җиләк-җимеш, яшелчә сатучы өлкәннәр видео өчен болай кылануны кабул итмәгән. «Ерундой занимаетесь, больные», – дип шелтәли аларны сатучы ханымнарның берсе.