Татарстанның атказанган сәнгать эшлеклесе, профессор, продюсер, журналист Миләүшә Айтуганова уйга баткан. Виртуаль дусларыннан ул: «Тузганак белән ничек көрәшәсез?» – дип сораган.
Тузганак безгә «одуванчик» буларак күбрәк таныш. Хәзер аның бөтен дөньяны сары келәм итеп, чәчәк аткан мәле. Беренче карашка, бер гөнаһсыз бу үсемлек белән ник көрәшергә, үссен, матур бит, диярсез. Ләкин үзләре йорт-җир белән торучылар белә инде. Бу үсемлек чүп үләннәре рәтенә керә. Ишегалды, бакча тирәсен чиста, тигез итеп газон чәчеп тотарга яратканнар өчен тузганак, чынлап та, котолгысыз бер дошман сыман.
«Сәлам! Сездә дә тузганак күпме ул? Чистый бөтен дөньяны басты. Ничек көрәшәсез? Киңәш бирегез әле...» – дип язган Миләүшә ханым да социаль челтәрдәге сәхифәсендә, яшел чирәмдә сары тәкыя киеп яткан фотосы астында.
«Балын ясарга», «Ел саен бөтен булган тузганакның чәчәген җыеп алып, күп итеп тәкыя үреп дусларга, танышларга таратсагыз, ике-өч елдан бетәчәк», «Вакытында үләнне чабырга», – кебек киңәшләр биргәннәр аңа.
«Көрәшмәскә. Сокланырга гына. Чәен эчәргә», – дип язучы да булган.
