Миләүшә Сибгатуллинадан борай бәлеше рецепты

«Туган тел» каналының Казандагы филиалы директоры Миләүшә Сибгатуллинадан борай (полба) бәлеше рецептын тәкъдим итәбез. Гадәттә бәлеш ярма белән иттән пешерелә. Журналист ит урынына ат картасы салган.

Борай бәлешенең камыры өчен 1 стакан сөт , 1 стакан тутырмыйча су, чүпрә 1 аш кашыгы шикәр комы салып бераз он кушып апара ясарга.

1 чәй калагы тоз, 2 йомырка сарысы, 1 чәй калагы көпшәкләндергеч (разрыхлитель) һәм он салып йомшак камыр куярга, кабарып менгәч төртеп төшерергә. Тагын бер менгәч шәп иттереп басарга.

Эчлек өчен 2 стакан борайга 4 стакан су салып, салмак утта 30 минутлап пешерергә, тоз салырга. Аннан өстен калын япма белән каплап, 2-3 сәгать томалап торырга.

Ит суганны сарымсак белән ак майда кыздырырга. Аннан борай белән болгатып, борыч, тоз өстәргә.

Камырны җәеп, эчлекне салгач, өстенә бер кап эретелгән ак май агызырга. 1 сәгатьтән соң кайнар шулпа салырга. Бәлешне 1 сәгать (ит белән булса 1,5 сәгать) пешерергә.

Духовкадан алгач, 30 минутлап өстен калын тастымал белән каплап тотарга.