Миләүшә Сибгатуллина: «Мәрхүмнең өчесен, җидесен, кырыгын ни өчен үткәрәләр?»
Журналист күптән түгел мәрхүм булган әтисен сагынуы турында язган.
«Туган тел» каналының Казандагы филиалы директоры Миләүшә Сибгатуллина әтисен сагынып, уйланулары турында язган.
«Өчесе, җидесе, кырыгы… Ни өчен үткәрәләр? Корьәндә язылмаган… Гадәткә кергән, дога бара. Кырык бер ясин чыгарга кирәк. Җирләнгәннең өченче көнендә җан раббысы каршына баса, җан күбәләк булып кайта. Өчесенә өстәлләр тезгәндә кайтты бит! (ышанасы килә…)
Давыллар булып кайтты. Паралмагачның «әти» ягы (әти сөялеп утыра торган өлеше) сынып төште. Ялганмады, кисеп яктык.
…җидесеннән кырыгына кадәр… Җанга тәмугъ һәм җәннәтне күрсәтерләр, кырыгыннан соң җирдән китәр. Барзахка. Мәңгелеккә.
Авылдашларга, туганнарга, күрше-күләннәргә зур рәхмәт. Кайгы бергәләп күтәргәндә җиңеләя.
Өчесен үткәргәч, җанга рәхәт тынычлык иңә. Җидесен уздыргач, күңелдәге бушлык тулылана төшә. Ярый әле соңгы сулышына кадәр янында булдым. Ярый әле теләгәндә су бирә алдым. Ярый әле соңгы көнендә дә әти яраткан кайнар, куе, сөтле чәйне ясап эчертә алдым. Ярый әле ясин чыгып, аз булса да хәлен җиңеләйтә алдым (шулай дип уйлыйсы килә)
Әтиии… Авылга кайтсам… Син бүлмәңдә гәҗит укып ятасыңдыр төсле», - дип язган ул.
Якынын югалту ачысын кичергән инстачылар да таныш хисләр кичерүләрен язган, шулай ук сабырлык теләп язучылар да күп.