Миңнеханов чит илдә һәлакәткә юлыккан яшь гаиләне Казанга кайтарарырга фәрман бирде
Роман һәм Снежанна Ашмариналар Доминиканада ял иткәндә юл-транспорт һәлакәтенә юлыккан.
Татарстан Президенты Рөстәм Миңнеханов Доминикана Республикасында ял иткән вакытта юл һәлакәтенә очраган Татарстан туристларын Казанга кайтаруны оештырырга йөкләмә бирде. Бу хакта «Татар-информ» агентлыгына ТР Президентының матбугат хезмәтеннән хәбәр иттеләр.
«Рөстәм Миңнеханов зыян күрүчеләрне тиешле медицина ярдәме күрсәтү өчен Татарстанга алып кайту мөмкинлеген өйрәнергә кушты», - дип искәрттеләр матбугат хезмәтендә.
ТР Сәламәтлек саклау министрлыгының матбугат сәркатибе Әлфия Хәсәнова билгеләп үткәнчә, туристларны кайчан кайтарачаклары билгеле түгел әле.
«Хәзерге вакытта барысы да зыян күргән россиялеләрнең хәленә бәйле. Татарстан туристларының хәлен табиблар уртача авырлыкта дип бәяли. Зыян күрүчеләр Мәскәүгә кайтаруга ук безнең белгечләр аларны Казанга алып кайтачак», - дип аңлатты Хәсәнова.
ТР сәламәтлек саклау министры Марат Садыйков Татарстан туристларының сәламәтлеген контрольдә тота һәм Доминикана Республикасының Игуэй шәһәрендәге дәвалау учреждениесе белән даими элемтәгә керә.
«Татар-информ» агентлыгы юл һәлакәтенең 26 ноябрьдә булуы хакында хәбәр иткән иде инде. Россия туристлары утырган автобус йөк автомобиле белән бәрелешкәннән соң әйләнеп капланган, барлыгы 51 кеше зыян күргән, шуларның дүртесе – татарстанлылар. Аларның өчесе авыр хәлдә дип хәбәр ителгән иде. Һәлакәт Игуэй шәһәре янында була.
Зыян күрүчеләр арасында Казаннан ирле-хатынлы Снежанна һәм Роман Ашмариннар да бар. Аларның туганнары агентлыкка Романга табиблар ярдәме таләп ителмәве, хатынының исә куллары һәм аяклары җәрәхәтләнүе хакында сөйләде. Ашмариннар октябрь азагында язылышкан һәм ноябрь азагында ялга киткән.
