Менделеевскида коеда балалар үлгәч, «Таткоммунэнерго» хезмәткәрләрен кулга алганнар

Менделеевскида 2 бала һәлак булганнан соң, «Таткоммунэнерго» компаниясенең 2 хезмәткәрен кулга алганнар. Бу хакта «Татар-информ» яза.

Агентлыкка билгеле булганча, компания хезмәткәрләрен 7 гыйнварда ук кулга алганнар – суд аларның икесенә дә өй аресты билгеләнгән.

«Татар-информ» 4 гыйнварда Менделеевск шәһәрендә өсте ачык булган канализация коесында 10 яшьлек ике малайның мәете табылганын язган иде. Люксыз кое тау янәшәсендә булган. Балалар таудан шуып төшкәч, шул коега төшеп киткән. Җинаять эше ачылган. Ачыкланганча, өсте ачык кое «Таткоммунэнерго» оешмасы балансында булган.