Менә сиңа бүләк! Югары вазифада эшләүче өч хәрбине Мәскәүдә шартлатмакчы булганнар
![Менә сиңа бүләк! Югары вазифада эшләүче өч хәрбине Мәскәүдә шартлатмакчы булганнар](https://intertat.tatar/resize/shd/images/uploads/news/2024/7/10/d3d3f48f091a643017ecccad411fd605.jpg)
ФСБ хезмәткәрләре Украина махсус хезмәтләренең Мәскәүдә югары вазифадагы 3 хәрбине шартлатырга тырышуын булдырмый калган. Бу хакта ФСБның җәмәгатьчелек белән элемтә үзәге хәбәр итте, дип яза «РИА Новости».
«Россиянең Федераль иминлек хезмәте Украина махсус хезмәтләренең Мәскәүдә Россия Оборона министрлыгының югары вазифадагы 3 хәрбиенә карата террорлык акты омтылышын булдырмый калды», – диелә хәбәрдә.
ФСБда сөйләүләренчә, Украина хәрби разведкасына ялланган 30 яшьлек россиялене тоткарлаганнар. Ул куәтле 3 бомбаны бүләк рәвешендә төрә һәм курьер хезмәте аша Оборона министрлыгы бүлекчәләре җитәкчеләренең яшәү урынына җибәрүне оештыра. Курьерлар посылканы тапшырганнан соң, бомбаларны шартлатырга тиеш булалар.
Кулга алынган ир-ат үзен май аенда вербовкалауларын сөйләгән. Аның сүзләренчә, ул, акча өчен, кураторларының йөкләмәләрен үтәргә ризалашкан.
Аңа карата «Теракт ясау омтылышы һәм шартлаткыч матдәләр һәм җайланмаларның законсыз әйләнеше» маддәсе буенча җинаять эше ачылган. Тикшерү дәвам итә.