«Менә ичмасам, булган хатын»: Алинә Сафиуллина утын яра
Җырчы утын ярган видеосын куйган.
Җырчы Алинә Сафиуллина авылда үзизоляциядә утын ярып караган. Бу эшен дәлилләп, видео да куйган. Видео янына: «Әтинең утын ярырга да кеше юк, дип сукранып йөргәнен күреп, тотынган эш иде. Җиңел түгел икән, билгә бәрде, хәлне алды», - дип язган ул.
Җырчының танышлары бу видеоны күреп шаккаткан. Әллә ничә тапкыр якынайтып карадым, синме икән дип», - дип язганнар.
Утын яручы хатын-кызлар да киңәшләрен биргән, ә ир-атлар ярдәмнәрен тәкъдим иткән.
«Минем ирем кеше хатыннары утын яра ди»;
«Бер шелтә бар! Утын ярганда, балтаң ялгыш эләкмәсен өчен, аякларны аерып басалар»;
«И сеңлем, терәк булырлык ир булсын яныңда! Башыңа төшмәсен, ирләр эшен ирләр эшләсен дип телә! Әле тормыш болай да күрсәтә ул!»;
«Көч икән синдә, сөбханалла, күз тимәсен! Аллаһ үзеңә тиң, бер-берегезне яратып торырлык хәерле ир насыйп итсен»;
«Катырак сук инде», - дип комментарийлар калдырган инстачылар.