Пермь шәһәрендә 16 яшьлек студент кызны җиңел машина бәрдереп киткән. Медицина көллиятендә укучы кыз үзе кешеләргә ярдәм итәргә хыялланган булган. Бу турыда «Комсомольская правда» яза.
«Мин таксида бара идем, кисәк кенә тавыш ишеттем, башымны күтәреп карасам, юлда кыз ята. Алдан узып киткән машина төрле якка болгый-болгый китә, аннары башка машиналарга бәрелеп, туктый. Машинадан исерек ир-ат чыга, чайкала-чайкала юл буйлап бара», – дип сөйли авариянең шаһиты.
Фаҗига 26 апрельдә кичке бишенче яртылар тирәсендә була. Hyundai Accent светофорның кызыл төсенә бара һәм җәяүлеләр юлындагы кызны бәрдерә. Аннары тагын берничә машинаны бәрә. Шаһитлар полиция һәм ашыгыч ярдәм чакыра.
16 яшьлек кызны табиблар коткара алмый, ул һәлак була. Ана реанимация ясап карыйлар, тик ярдәме генә тими.
Бу авариядә тагын бер ир-ат имгәнә. 48 яшьлек ир-ат хәзер хастаханәдә ята, аның гомеренә куркыныч янамый.
Мәрхүмә кыз Пермь медицина көллиятенең беренче курсында укый. Ул Сылва бистәсендә туган, табиб булырга хыялланган. «Бик актив, игелекле, иҗади, ярдәмчел кеше иде», – дип искә ала якыннары.
Екатерина волонтерлык белән шөгыльләнә, балалар хастаханәсендә эшли. Ял көннәрендә Сылвага кайтып, әнисе, әбисе һәм бабасына ярдәм итә.
Җинаятьтә шикләнелүче ир-ат тоткарланган, тикшерү бара, диелә хәбәрдә.