Меңләгән кешенең иртә үлеме сәбәбе билгеле

Галимнәрнең халыкара төркеме 2015 елгы мәгълүматларны анализлаганнан соң, кешеләрнең иртә үлеме сәбәбен ачыклаган, дип яза Лента.ру сайты. Бер елда 385 мең кеше автомобильдән чыккан газлардан үлгән, дигән нәтиҗә чыгарган алар.

Тикшерүчеләр дизель һәм башка двигательләрдә эшләүче транспорт чараларының, шул исәптән автомобильләр, йөк машиналары, автобуслар, корабльләр, авыл хуҗалыгы һәм төзелеш техникасының халык үлеменә тәэсирен өйрәнгәннәр. 

Галимнәр исәпләвенчә, 2015 елда үлгән 11% халыкның үлеме ягулык янудан чыккан газлар аркасында булган. Сулыш органнары, йөрәк эшчәнлегендәге тайпылышлар, инсультлар һәм диабеттан күргән зыян триллион доллар белән исәпләнә икән. 

Әйтик, Кытайда гына да автомобиль газлары аркасында 114 мең кеше үлгән. АКШта, Франциядә, Германиядә, Италиядә һәм Индиядә дизель дигательләреннән чыккан газлар аркасында үлүчеләр саны арта, ди галимнәр.