Башкортстан Башлыгы Радий Хәбиров махсус операциядән кайткан Азат Бадрановны Республика Башлыгы администрациясе җитәкчесенең эчке сәясәт буенча беренче урынбасары итеп билгеләде.
Моңа кадәр Республика Башлыгы администрациясе җитәкчесенең беренче урынбасары булган Урал Килсенбаев Башкортстан Хөкүмәте премьер-министрының беренче урынбасары вазифасына күчә. Азат Бадранов карамагында элек булган мәсьәләләр дә аның күзәтчелегендә кала.
29 сентябрьдә Башкортстан вице-премьеры Азат Бадранов махсус хәрби операция зонасына үз теләге белән хезмәткә китте. Республика башлыгы Радий Хәбиров хезмәттәше һәм дустына теләктәшлек белдерде. Азат Бадранов 3 октябрьдән хәрби әзерлек узган. Соңрак ул махсус хәрби операция зонасына октябрь ахырында – ноябрь башында китәчәген хәбәр итте. Ноябрь ахырында ул хәрби хезмәткә үз теләкләре белән китүчеләрдән тупланган Шәйморатов исемендәге батальон сафына алынган.
