Чаллының 19нчы мәктәбендә бүген көтелмәгән, әмма бик тә шатлыклы очрашу булган. Махсус операциядән кайткан әтисе, зур йомшак уенчык, чәчкәләр күтәреп, дәрес вакытында кызының сыйныф бүлмәсенә килеп кергән.
Типсә тимер өзәрлек ир-ат үзләреннән-үзләре аккан күз яшьләреннән аз гына да читенсенми. Кыз исә «әтием» дип үксеп елый башлый, «сине башка беркая да җибәрмәс идем» дигән сыман, әтисен кысып-кысып кочаклый. Әлеге видеодан бала белән ата арасындагы эчкерсез мөнәсәбәтләр, ихлас хисләр бөркелә. Видеоны «Чаллы ТВ» телекомпаниясенең «Телеграм» каналына куйганнар.
Хәрби моңа кадәр 2 тапкыр Чечня сугышында катнашкан булган. «Бу юлы да читтә кала алмадым. Мин үземнең барырга тиешлегемне белә идем. Якыннарымның терәк булуы көч бирде, исән-сау кайтырга ярдәм итте», – дигән ул. Озак вакытлар әтисен күрми торган Язилә исә: «Әтиемнең кайтачагын белмәгән идем. Мин бик шат. Аны күрү белән елап җибәрдем. Бик нык сагындым», – дип сөйләгән телекомпания хәбәрчеләренә.